【The Minds of Billy Milligan 24個比利】

---

作者：

丹尼爾 凱斯

Daniel Keyes

.

好書指數：

8 / 10

.

---

呢個絕對係一個真人真事既經歷。比利（Billy Milligan）係一個多重人格既精神病患者。佢因為犯下多宗強暴同埋搶劫案因而被大眾所了解，同時因為佢嘅精神病而獲無罪釋放而被大眾批評同鄙視。呢個案件係心理學界同法律界都引起廣泛嘅討論：究竟精神病係咪一個正當既理由去豁免所犯嘅罪行？

成本書嘅內容主要圍繞比利同佢嘅心理醫生談話內容以及比利分裂成24個人格嘅經歷。當中可以睇到大眾對比利由一開始嘅不信任到之後有人表示對佢嘅支持，再到比利嘗試融入社會既經過。到最後比利唔係冇嘗試，但係社會嘅輿論同時俾咗佢好大嘅壓力去改善病情，令到佢最後重新分裂人格，成世都留係精神病院。

我睇完呢本書之後反思左有關正義既問題。第一，究竟比利有冇錯？如果我哋單純用法律嘅層面去睇比利絕對需要坐監。但係如果我哋單純從結果論去判佢有罪而唔理會佢係咪有不可抗力既原因既時候，我哋嘅判決係咪符合公義呢？第二，我哋點樣判斷一個人係咪有精神病呢？呢個問題既重要性在於如果個個犯完案之後都話自己有精神病，醫生又真係主觀地覺得佢有病，咁我哋可能令到一啲犯罪分子逍遙法外。究竟現時嘅方法足唔足以判斷到一個人有冇精神病呢？我對呢個問題保持極度保留既態度。

24個比利，24種人格，你可以當食花生睇下精神病患者點樣逃離法律既制裁，亦可以更深入諗下社會輿論與精神病患者之間既角力。畢竟......香港依家咁大壓力，你附近隨時有一個精神病患者需要你既體諒。