【The Undutchables 荷蘭不唬爛】

---

作者：

柯林·懷特、勞莉·布克

Colin White & Laurie Boucke

.

好書指數：

7.5 / 10

.

---

大部分人一諗起歐洲，通常會聯想起英國、法國、意大利、德國等等嘅國家，反而諗到荷蘭嘅機會率少好多。較早前，有幸到荷蘭一段時間，當地人比咗一本叫 Undutchables 嘅書（雖然本書有一段歷史），作者用諷刺嘅手法講荷蘭人有幾多奇怪嘅地方，而當地人介紹嘅時候都話：「作為一個荷蘭人，睇完先發覺自己係真係幾奇怪......」

黎到荷蘭一段日子，一邊生活一邊睇 Undutchables 係一件趣事，呢本書完美講解咗荷蘭人生活特質，基本上係衣食住行都講齊。作者詳細解釋咗政府為咗減少發展郊區而鼓勵市民到城市居住嘅方法，另外講咗荷蘭房屋同船屋嘅特色，真係唔講唔知，住船屋分分鐘係比一幢屋貴一倍，所以做得「水上人」嘅都係有錢人。另外，雖然荷蘭人牛高馬大，但係你會發現有d事物真係細到你會問點解佢地用得到，例如係細到轉身都有難度嘅洗手間、一架係正常車一半 size 嘅電動車（你見佢地上落車都用咗好耐)、一條好窄加好斜嘅樓梯（可憐公公婆婆要行下停下），呢d連作者都未必解釋到，只可以叫你接受下啦......

作者仲寫咗荷蘭人 Open And Direct 嘅性格，佢地覺得係一件好事，所以唔難理解佢地成日唔小心得罪其他國家嘅人，就算荷蘭有好多外國遊客，不過荷蘭人呢個「美德」依然保留，所以大家真係要體諒下佢地。另外，作者舉出咗唔少例子解釋荷蘭人追求「有得選擇」嘅精神，本人都經歷過嘅係：「我地有 A 同 B 比你選，不過A就冇哂啦。」作為一個講求效率嘅香港人，係一種耐性嘅鍛練。作者更形容「優惠」對荷蘭人嘅重要性，睇完本書去超級市場先發現作者完全冇誇張，「半價」同「買一送一」嘅標籤隨處可見，真係大開眼界。如果冇呢本書，你未必明白點解公共交通成日提醒拍卡、荷蘭人點解一見太陽就衝哂出草地曬太陽、點解開放式廁所隨處可見，呢類故事未必可以只靠旅行就了解到。

雖然本書係大約十年前出版﹐不過作者有不斷更新內容，查一查先發現 Undutchables 已經有中文版，如果各位黎緊去荷蘭，不妨睇睇呢本書，睇住一本遊記去旅行，都係一個唔錯嘅選擇。