【Blockchain Revolution 區塊鏈革命】

---

作者：

徐明星、劉勇、段新星、郭大治

.

好書指數：

6 / 10

.

---

有無諗過以後銀行唔再存在、投票唔需要再到票站排隊、電話Data唔夠可以向朋友買？區塊鏈 is the ultimate solution! 相信大家一聽到Blockchain必定有以下既疑問。作者嘗試解答一下。

問題一：Blockchain區塊鏈係d咩？

區塊鏈係一本分散式既帳簿。舉個例子，你平時會將每日既收入同支出紀錄係你本小熊簿仔入面，每一頁代表一日。呢本小熊簿仔有2個特別之處：第一，每一頁都同前後果一頁用鏈連著，如果你想改其中一頁既內容，果頁之後既全部鏈都會斷左，所以你唔可以改佢；第二，你呢本小熊簿仔係公開比人睇既，其他人可以save一份copy，所以佢叫「分散式」。

問題二：Blockchain區塊鏈有咩咁特別？

試想像一下以下情景：你想whatsapp send幅圖比阿媽，你send既呢幅圖只係copy，並唔係原圖。依家你想whatsapp send你果3000蚊家用比阿媽，你send唔到，因為你唔可以copy 3000蚊（請暫時ignore微信呢個功能）。區塊鏈之所以被視為係一個帳簿，係因為你可以透過一個公家既帳簿，話比所有人知你要過3000蚊比你阿媽。特別之處係平時過數你需要通過銀行，銀行作為中介人hold住呢本帳簿問3問4，隨時幾日後先過到數，而Blockchain可以即時、唔收手續費搞掂。

問題三：除左銀行，Blockchain區塊鏈仲有咩應用？

Bitcoin比特幣、Smart Contract智能合約、Real Sharing Economy共享經濟。我特別想講下智能合約：智能合約係用程式碼編寫成既合約。佢最大既威力在於能夠準確執行合約內容。舉個例子，你想同你細佬賭聽日西伯利亞A地區會唔會落雨。你可以同細佬訂立一份智能合約，列名根據世界時間4月15號整日，按照西伯利亞天文台既資訊，如果降雨量大於0，你細佬既account會自動扣錢去買部iPhone7比你，反之亦然。你可以利用區塊鏈訂立任何合約（包括投票，買賣股票，租車等等）

呢本書好適合beginner去睇。如果大家有興趣既不妨多了解下呢個技術，話唔定將來你都會有一個blockchain account！